Nova xornada de paro xeralizado no sector do Metal na comarca de Vigo, que tivo un importante seguimento nas zonas industriais e que foi moi maioritario no naval. De novo, desde as sete e media da mañá os traballadores do sector xuntábanse nas portas dos estaleiros e nas principais zonas industriais. Desde as zonas dos estaleiros de Vulcano e Barreras sairon en marcha até a Praza do Rei, onde se lles unirían máis traballadores que proviñan doutros piquetes.
Asi, en manifestación polo Paseo das Camelias volveron ser milleiros os traballadores que participaban desta mobilización, e que se concentraban pouco despois das dez da mañá fronte aos xulgados.
Na sala nº1 do Penal tiña lugar o xuízo contra estes catro traballadores, no que se volveu demandar a "libre absolución" destes compañeiros. É de salientar as contradicións nas que entraron os policias nas súas declaracións neste xuízo, asi como a sorpresa que supuxo que finalmente se personara neste proceso xudicial o concello de Vigo reclamando 19 colectores, pero sen apresentar ningún tipo de peritaxe ao respecto.
Fontes xudiciais sinalan que o máis probábel é que a sentenza deste xuízo non sexa pública até dentro dun mes.
Ao remate deste xuízo, tivo lugar unha asemblea fronte aos xulgados, na que interveu Miguel Malvido, secretario nacional da CIG-Metal e na que sinalou que"é importante que continuemos atentos, porque agora o xuízo quedou visto para sentenza, e atentos, porque neste ano temos negociación do convenio provincial".
Malvido lanzou unha mensaxe tanto para os traballadores e traballadoras presentes como para os empresarios:"esta convocatoria de folga non foi un fraude de lei, e a convocatoria si que era para estar aqui hoxe cos catro compañeiros, porque todos nos estabamos a sentir xulgados e no banco de acusados, e non é fraude de lei porque a patronal sabe que os maiores incumpridores do convenio son eles, e a ver cando dunha vez por todas temos a algun deses incumpridores e estafadores sentados no banco de acusados".
Malvido adiantou que "queda por diante un ano complexo, unha negociación complicada , e aínda que é certo que hai crise, pero non é menos certo que esta crise non a xeramos os traballadores, e imos pelexar como sempre, e teremos que estar na rúa outra vez para pelexar por un convenio digno".
Cándido Gónzález, traballador da Naval Xixón e membro da Corrente Sindical de Esquerdas de Asturies, participou tamén nesta asemblea final e amosou a súa satisfacción "por compartir esta xornada de loita contra a represión", e subliñou que "isto é un exemplo de solidariedade e asi é como se debe de loitar". Cándido engadiu que "en Asturias temos os mesmos problemas , porque a clase obreira estamos a ser vítima da represión por loitar contra un sistema fracasado, e póñennos condenas por defender os nosos dereitos, e a nós condenáronnos a tres anos de prisión, ao compañeiro Morala e a min, que tamén está aqui, e grazas á solidariedade e á loita na rúa en vinte días tiveron que poñernos en liberdade. Ese é o exemplo a seguir, o apoio solidario da clase traballadora cara calquera compañeiro que vaia ser xulgado é moi importante, porque se queren xulgar a un que nos xulguen a todos".
Nenhum comentário:
Postar um comentário